Trampdan Maduraya 'günlərin sayılıb' təhdidi

Donald Trampın Venesuela, Həmas və Netanyahu ilə bağlı sərt mesajları

ABŞ-ın sabiq prezidenti Donald Tramp CBS televiziyasında yayımlanan "60 Minutes" proqramında jurnalistlərin suallarını cavablandırıb. Onun müsahibəsində Venesuela ilə münasibətlər, Həmasla bağlı iddialar və İsrailin baş naziri Binyamin Netanyahu haqqında fikirləri diqqət çəkib.

Venesuelaya müdaxilə və Maduroya xəbərdarlıq

ABŞ-ın Venesuela ilə müharibəyə girib-girməyəcəyi soruşulduqda, Donald Tramp "Bundan şübhələnirəm, belə düşünmürəm," deyə cavab verib. Lakin o, Venesuela rəhbərliyini sərt şəkildə qınayaraq əlavə edib: "Onlar bizə qarşı çox pis rəftar edirlər, təkcə narkotik deyil, həm də ölkəmizə yüz minlərlə istəmədiyimiz insanları – həbsxanalarından, ruhi sağlamlıq müəssisələrindən buraxıblar."

Venesuela ilə bağlı problemin narkotik ticarəti, yoxsa Nikolas Maduronun devrilməsi olub-olmaması sualından yayındıran sabiq prezident, "Maduronun günləri sayılıdırmı?" sualına "Bəli, belə deyə bilərəm" deyə cavab verib. Venesuela torpaqlarına ABŞ-ın hərbi hücumu təşkil edib-etməyəcəyi ilə bağlı suala isə Donald Tramp "Bu, doğru olsun, ya olmasın, bunu sizə söyləməyə meyilli deyiləm. Mən bunları jurnalistlərə demirəm," deyə qeyd edib.

Həmasın "silahsızlaşdırılması" iddiası

Yaxın Şərqdəki vəziyyətlə bağlı danışan Donald Tramp, Qəzzadakı atəşkəsin "kövrək" olmadığını bildirib. O, Həmasın istənildiyi zaman "dərhal aradan qaldırıla biləcəyini" iddia edərək vurğulayıb: "Əgər onları silahsızlaşdırmaq istəsəm, bunu dərhal edərəm, yoxsa aradan qaldırılacaqlar, bunu bilirlər."

Netanyahuya dəstək və İranın nüvə proqramı

ABŞ-ın sabiq prezidenti Donald Tramp İsrailin baş naziri Binyamin Netanyahunu Qəzzadakı atəşkəsdə olduğu kimi "Fələstin dövlətini tanımaq mövzusunda da sıxışdırıb-sıxışdırmayacağı" sualını cavablandırıb. O, "Bəli, onu bəzi məsələlərdə bir az sıxışdırmam lazım idi, bunu etdim. Onunla çox yaxşı işlədim, lakin etdiyi bəzi şeylərdən xoşum gəlmədi və bu barədə nə etdiyimi gördünüz," deyib.

Tramp Netanyahuya qarşı irəli sürülən hüquqi ittihamlarla bağlı ona "ədalətsiz rəftar edildiyini" iddia edib: "Düşünürəm ki, ona bir qədər kömək etmək üçün bu prosesə qoşulacağıq, çünki bunun çox ədalətsiz olduğunu düşünürəm." Tramp həmçinin Netanyahu ilə birlikdə İranın nüvə potensialını aradan qaldırdıqlarını qeyd edərək, Tehran rəhbərliyinin artıq "heç bir nüvə potensialının" olmadığını müdafiə edib.

24 saat