Duzdağda özəlləşmə: Yüzlərlə işçi işsiz

Naxçıvan Muxtar Respublikasında yerləşən Duzdağ mədənlərində istehsalın dayandırılması yüzlərlə işçinin işsiz qalmasına səbəb olub. Mədən əməkdaşları, əsas istehsal müəssisələrinin fəaliyyətinin bir neçə gündür tamamilə dayandırıldığını və mədənlərə giriş-çıxışın qadağan edildiyini bildirirlər.

İşçilərin narahatlığı: Rəsmi səbəb yoxsa məmur maraqları?

Rəsmi açıqlamaya görə, mədənlərdə "çökmə riski" aşkarlandığı üçün fəaliyyət müvəqqəti dayandırılıb. Lakin mədən işçiləri bu iddia ilə razılaşmır. Onların sözlərinə görə, əslində mədənlərin "vəzifəli şəxslər arasında bölüşdürülməsi" prosesi gedir. Bir əməkdaş vurğulayıb ki, bir neçə aydır mədənlərin çoxu heç bir əsas olmadan bağlı idi və istehsal minimuma endirilmişdi. "İndi isə guya təftiş aparılıb və çökmə riski olduğu deyilir. Amma niyə bu risk özəlləşmə prosesi başlayandan sonra ortaya çıxdı?" deyə işçi sual edir.

Mədənçilər bildirirlər ki, sahədə müəyyən çatlar əvvəllər də müşahidə olunsa da, bu, istehsalın dayanmasına səbəb olmayıb. Onların arasında 10-15 il təcrübəsi olanlar var ki, bu müddət ərzində heç vaxt belə real təhlükə ilə qarşılaşmayıblar. "Əgər həqiqi təhlükə olsaydı, bunu ilk biz hiss edərdik", - deyə təcrübəli mədənçilər qeyd edirlər.

Sosial və iqtisadi təsirlər: Maaşsız qalan işçilər və duz qıtlığı

Mədənlərin bağlanması təkcə işçilərin deyil, yerli sakinlərin də həyatına ciddi təsir göstərib. Əməkdaşlar aylardır maaş ala bilmədiklərini və bir çoxunun məcburi şəkildə işdən ayrılmaq məcburiyyətində qaldığını söyləyirlər. "Mədənlər uğrunda gedən mübarizədə zərəri isə biz fəhlələr çəkirik", - deyə onlar qeyd edirlər.

Artıq Naxçıvan bazarında yerli Duzdağ duzu tapmaq çətinləşib, idxal olunan məhsulların qiyməti isə artıb. Yerli istehsalın dayandırılması səbəbindən mağazalarda əsasən kənardan gətirilən duz satılır, bu da əhalinin büdcəsinə əlavə yük yaradır.

Özəlləşdirmə prosesi və iddialar

Duzdağda ən böyük istehsalçı "Naxçıvan Duz İstehsalı" MMC idi. Bu müəssisə cari ilin may ayında özəlləşdirmə məqsədilə tenderə çıxarılıb. Qeyri-rəsmi məlumatlara əsasən, tenderin qalibi "Şərq-Qərb" ASC olub. İddialara görə, bu şirkətin 96 faizi Azərbaycan Respublikası Prezident Administrasiyasının sabiq rəhbəri Ramiz Mehdiyevin oğlu Teymur Mehdiyevə məxsusdur. Mədənlərin dayandırılması və özəlləşdirilmə prosesi ilə bağlı yaranan bu vəziyyət, ölkədə korrupsiya iddialarının yenidən gündəmə gəlməsinə səbəb olub.

24 saat